小手大辦桌：藝術、台語佮戲劇 ê 奇妙一工
邊耍邊學，對欣賞到辦桌
國立臺灣美術館佇歇熱舉辦『2025 國家語言視覺藝術體驗營──藝術ka辦桌』台語一日營。活動以「藝術欣賞」、「創意辦桌」、「正港 ê 臺灣文化」做三大特色，透過囡仔耍、戲劇佮台語學習，予囡仔佇一工ê營隊內底，創造出屬於家己 ê 故事。
囡仔佇囡仔耍中學藝術
活動一開始，營隊的演教員先tshuā囡仔入去展廳，欣賞袁金塔 ê〈迎神賽會〉。紲落來佇營隊的「秘密基地」，透過囡仔耍來認識陳景容 ê〈西瓜攤〉、席德進 ê〈閑坐〉、陳國展 ê〈收桌〉佮許武勇 ê〈臺南市西羅殿〉等作品。囡仔體驗「對比」囡仔耍，用身軀演出「硬／軟」、「絕望／希望」、「邪惡／善良」等對反ê 動作；閣有「焦點」練習，用目神抑是身軀各部位指向綠球，學習按怎去掠畫作內底 ê 視覺焦點。透過隨個 ê 設計，囡仔邊耍邊理解藝術家按怎透過構圖、色彩引tshuā觀眾 ê 目光，嘛培養目識佮表現ê才調。
台語囡仔耍添趣味
食晝過後，活動tshuā台語歌曲〈藝術ka辦桌〉，老師閣設計「排字陣」囡仔耍，予囡仔揣出台語詞彙，親像「雞卵糕」、「圍做伙」，閣練習做句。有囡仔著講出：「歹人圍做伙，毋知欲做啥歹代誌」，予逐家聽甲笑咍咍。紲落來，囡仔用身軀排演畫作 ê 意境，閣發展出「結婚」、「學業有成」、「祝壽」、「入厝」等戲劇。國小組 ê 新郎新娘佇〈西瓜攤〉相拄，國中組 ê「烏狗兄」嘛用激五仁ê 生日歌，予逐家真心適。尾仔，大家閣親手繪製「辦桌菜色」，予藝術變做一場鬧熱佮有人情味 ê 饗宴。
台語文化活起來
佇這擺囡仔耍、營歌佮戲劇內，囡仔自然開嘴講出台語：「阿爸！我欲食雞卵糕！」 ê囡仔話，抑是將「虛咧咧」變做上學心情 ê笑詼，攏予語言對冊內走入日常，是活潑閣有趣味。
一工 ê 活動，設計真工夫閣充實，囡仔一面提升台語表達能力，一面閣佇藝術引tshuā下激發自我潛能。台語毋嘛是課本內 ê單字彙，閣是演繹生活故事 ê 橋樑。國美館透過這个迒領域 ê 營隊，成功串連視覺藝術佮語言保存，搭一座文化傳承 ê 橋樑，予囡仔對藝術到佇語言，深刻感受臺灣獨特 ê 文化。
公民記者 黃陸群 台中報導
回應文章建議規則：