深坑老街風華再現 百年古厝生態永續

2025年peopo公民新聞Try拍的活動

來到新北市的深坑仔

一陣公民記者用家己的鏡頭

來寫一段過去的故事

深坑仔對清朝開始慢慢發展

1901年日本政府佇遮設立深坑廳

這馬的文山區佮新店 石碇 坪林

攏是彼陣深坑廳管理的範圍

較早公路交通較無利便的時代

佇附近生產的貨物

攏著愛對深坑仔渡船頭

行景美溪送出去台北

深坑仔舊街經過百外年的時間

到這馬已經變成逐家

愛去𨑨迌的好所在

除了上出名的豆腐

猶有真濟傳統紅磚仔起的厝

佮誠特別的亭仔跤

在地人的信仰中心

集順廟和土地公廟仔

到這馬猶原是鬧熱滾滾

離開舊街

閣來到山頂的炮子崙

拜訪超過百年以上的塗墼厝

主人蔡金來班長

到這陣仝款堅持

傳統的做法來維護這間厝

伊用田土來濫稻草

曝焦了後變做塗墼

就會使提來修理古厝

另外伊嘛教逐家一寡

崁厝愛注意的鋩角

深坑經過遐爾長的時間了後

猶原閣保留真濟

有價值的文化資產

逐家有閒一定愛來遮𨑨迌

公民記者 影舞者 新北市報導