伯公庇佑下的客庄生活

傳承客庄人情摎文化

正月半，係客庄一年當中當重要个日仔。在台中東勢石圍墻个芎蕉下伯公廟，毋單淨係大家拜土地公个所在，還係在地人共同个生活記憶。

照片

石城國小个校長表示，這位仔毋單淨係來求平安、拜伯公，還係佢細漢時讀書、尞尞个所在。佢講，細漢時常常對這位爬上後山，去阿姨屋下尞，放學抑係假日，大家會約等共下來這位集合、尞，甚至有人會在伯公廟讀書。

照片

對在地居民來講，伯公廟乜係日常生活个一部分。伯公桌頂常常會放糖仔，細人仔拜好就會拈一粒來食；大人做事做忒，也會來這位坐等聊聊天。逐日還會換新茶，表示對伯公个敬重。這位還有「伯公牌」，逐家輪流請轉去供奉，這種傳統到今還在繼續。

芎蕉下伯公廟乜保留當多客家傳統文化。像係「新丁粄」同「新婚酒」，屋下有添丁个人會做新丁粄來拜伯公；有結婚个，隔年正月半也會帶甜酒來報喜，象徵甜甜蜜蜜。這兜供品都會先敬伯公，過後正同庄下人共下分享。

照片

逐年个新丁粄節，係地方當鬧熱个活動之一。大家會共下鬥粄、食福，乜係庄下人團圓个重要時節。主辦單位表示，這活動毋單淨係鬧熱，還較重要个係分大家有參與个機會。

照片

校長也講，這幾年學校會帶細人仔來參加活動，分佢兜對細漢就認識在地文化。佢希望，細人仔大漢以後，還會記得自家个故鄉，還有這兜傳統。

一間細細个伯公廟，連結等過去摎現在，乜承載等未來个希望。芎蕉下伯公廟，不單淨延續信仰，還分客庄个文化，一代一代傳下去。
 

照片

公民記者 sun sun 臺中東勢報導