前衛阿嘉

2009.02.27 12:24

地區:

臺灣

分類:

文字^-A A ⁺A

Éng-oán sú lâng hoâi-liäm ê A-ka läu-su

http://www.youcute.com.tw/aka/index.aspx

追念台灣文學作家陳恆嘉先生（1944-2009）

用目屎懷念阿嘉的笑聲。

2008/12/13，伊坐我的車，我載伊位台灣文學館去新化的楊逵紀念館，

路裡伊講伊足想欲「仔仔細細過日子」。

這是彼日阿嘉佇楊逵紀念館前的笑容。

願伊平安。　　　長松

前衛阿嘉 ⊙陳金順　　

老實講，到這當今我猶感覺我參阿嘉無偌深緣；不而過，我相信阿嘉飄撇的形影、浪漫的歌聲，的確會久長留踮我的腦海內。

　　雖罔十外冬前初初參與台文運動的跤兜，就捌見過阿嘉一面，佇我的記智內底，彼時你的頭毛就染霜雪，坐踮我的邊仔，你予我的第一印象是一位顧謙有修養的頂輩。減采你咱淺緣，一直無進一步交陪的機緣，落尾佇你為少年阿文仔的詩文集《海翁》踏的話頭裡，才知影你是一位佇咧大學教台文的先生。

　　2005年，我入前衛出版社無偌久，阿嘉受社長邀請擔當總編的職務，這對你來講減采是桌頂抳柑的空課路，你逐禮拜照常愛去就近的三間大學繼續兼課，繼續趁遐的薄釐絲的鐘點費。彼冬十一月底，佇我踮前衛食頭路的尾工，欲暗六點跤兜，我準備欲揹kha-báng坐捷運淡水線轉去枋橋的坎站，阿嘉唯兼課的學校裡敲電話入來公司，喚我愛聽候你轉來公司，你欲請我食暗為我送別；其實，我心肝內感覺受當袂起，毋過歹勢切你的意，小弟頇慢?酒，所致規暝以茶代酒感受你的溫情。

　　落尾，逗逗仔唯朋友的喙裡輕輕仔講出你的遭遇、你的家庭，小弟才深深感受是按怎這個世間遮呢無公平？是按怎濟濟像你遮呢有才情的人，會一生攏佇茫茫人海裡沐沐泅，揣無一條較好的出路。論真，我哪會毋知影這款世間的現實咧？文學家、藝術家在生看活過日、榮華富貴的自底就無幾口灶，親像受世間濟濟文學信徒欽服露西亞的契訶夫佮法蘭西的莫泊桑，怹參你相像是短篇小說的寫手，怹攏ph?ng你較短命，四十統歲就離開世間，不而過，怹攏留落數百篇短篇小說，予世間人借鏡；較可惜的是阿嘉你這個所謂戰後第二代的文學青年，減采受生活拖磨、環境所致，到tann創作總成績攏囥踮你咱鬥陣蹛過的前衛出版的《陳恆嘉集》裡。

　　古早人講得無毋著：「近廟欺神。」到這當今，我才想欲買你彼本少年時代用青春血汗所粒積出來的小說集，有影不止仔歹勢！尚且小弟舊年底出的散文集《賴和價值一千箍》，猶未親手交予你，想袂到你無話無句恬恬來離開。

　　好佳哉，十外冬來你佇幾落間大學掖種，傳授下輩人台文相關的智識佮經驗，嘛展現你創作以外的才情，書寫台語文學、台灣歌謠相關的論文；閣較予小弟欽服的是歲頭食到六十，你猶落南來成功大學台文所讀博士，雖罔袂赴完成論文戴彼頂頭毛落霜的博士帽仔，踮朋友弟兄的心肝底，你飄撇的文學氣質袂較輸濟濟食無三把蕹菜的文學博士。

　　舊年12月13是你咱最後見面的時間點，踮台灣文學獎的地場，你代表評審上台鼓勵得獎佮入圍台語小說的友志，感受你對台語文學的真心佮疼意，佇台灣文學館，佇你風霜的面頂，我看著友志相疼痛的深情。仝日下晡，你為著得南瀛文學獎佮出版作家作品集的幾位友志，陪伴眾人到楊逵紀念館觀禮，你的身影予長松化作永久的寫真，這是你最後一擺活靈靈徛踮小弟的目睭前。

　　唯你一寡對文學見解的片段，我知影阿嘉你毋是袂曉變竅的文學教授，嘛毋是干單會曉編死冊的總編輯，你絕對是一位予現實環境埋沒才情的前衛阿嘉。

　　阿嘉，毋通閣?酒醉，你就勻勻仔行。

──2009.2.26寫佇阿嘉過身第二工，台南大學碩士生研究室。