世界第一張郵票

共台灣的郵票浸佇水裡，準備洗郵票！

一逐久的時間，郵票自然退糊，khǹg佇衛生紙欶水、乾去就通保留。

配合文化部台語家庭活動，台語教學支援教師林麗玉，受邀請佇高雄圖書總館，用台語𤆬親子團，認捌世界第一張郵票的歷史！

現場氣氛真鬧熱，毋但學著世界第一張郵票，是1840年5月初6，英國的黑便士郵票，頂頭烏白的是前維多利亞女王像；這張是當當年英鎊1便士、ONE PENNY，老師嘛紹介郵政改革家羅蘭希爾，也運用咱台灣的中華郵政注音符號郵票，予大人囡仔透過地圖，進一步認捌郵票和咱臺灣各地行政區。

tshuǎ囡仔小光和妙妙來參加活動的陳媽媽講：「因為這馬罕得寄批，另外閣是用台語，按呢足心適的！」

小光講：「老師分的禮物，臺灣的地圖你敢看有？有！」陳爸爸表示：「像按呢共伊洗落來這个動作，已經上起碼十幾冬以上毋捌接觸著，郵票這个物件矣！」

來參加的民眾分享：「已經有差不多三十冬無耍矣！少年的時陣逐家攏會耍，這馬是來複習的。」

台語支援教師 林麗玉表示：「世界第一張郵票是引起動機，主要是欲予咱知影講，咱臺灣　咱這塊土地，咱臺灣各縣市攏有一个代表的符號，毋是食食的，抑無就是𨑨迌的一寡觀光景點，我感覺這就是佮咱在地生活有結合的。」

課程結束進前，囡仔共一張一張洗好的郵票，抾佇郵票簿仔，珍惜的毋但是世界的歷史，閣較是對臺灣文化的疼心。

公民記者 阿英 綜合報導&&