生活即藝術＿嘉義草草戲劇節

公民記者 高渝莉 嘉義報導

逐年的三月攏是嘉義上鬧熱的時陣，草草戲劇節的活動。今年已經是連續舉辦的第十三冬。每一冬的主題都無相仝。主辦單位阮劇團分享講，當初時這个活動創辦的目的，是欲鼓勵高中生對戲劇的興趣，提供in一个發表公演的舞台。發展到今，已經變做是嘉義一個，真有代表性的在地藝文活動。

阮劇團成員 盧志杰：

草草戲劇節今年已經第十三年矣，伊每一年的主題攏無仝款。當初時一開始十三年前，只是為著欲幫助遮的高中生，In做戲劇的公演。尾手的時陣著是感覺講，這園區遮媠遮大。阮團長著想講，按呢觀眾來遮看戲著走傷無彩。著開始有外口的表演有市集，一年一年愈來愈大，發展到這馬十三年矣，已經變做咱嘉義，一个足有代表性的藝術節。

表演的藝術家牧夫肢間分講，這擺佇草草戲劇節表演的作品，叫做代袋無驚。是咧講塑膠產品發明了後，對這个時代的影響，in想欲透過生活中發生的大大小小的代誌，來當作創作的靈感。這擺透過台語作品來和觀眾朋友互動，劇團的向望，是希望以後嘛會使繼續使用台語來創作。

牧夫肢間 團長：

這已經是我佇草草表演的第六冬矣，逐年佇遮發表的作品其實攏無相款。這擺的表演是咧講，塑膠這个物件。塑膠其實就是石油廢材的一部分，其實算是一个誠好的發明。就親像傳家之寶，會當一代一代一直傳承落去。我真合意生活藝術，用生活中的創作來佮逐家互動。我感覺台語是一个袂䆀的語言，所以會當繼續用台語來創作。我感覺台灣的語言其實誠古錐，伊有一種真強的文化底蘊，所以肢體佮語言馬會使佇咱的文化表演內，好好仔去發展。

阮劇團創辦草草戲劇節，閣有一个目的，著是想欲予民眾知影講，戲劇本身其實是一件足四常的代誌。所以園區內底有真濟無仝的小型演出，有尪仔、有做人戲的、有舞蹈的。予觀眾感覺表演藝術其實是會使足親切的。

參加的民眾：

我進前大學的畢業作品，是做戲劇的表演。所以我知影這个活動了後，我著想共佮朋友做伙來看覓台灣的藝術表演。今仔日來到遮，看著足濟人，嘛有市集閣有足濟表演，感覺足歡喜矣。

參加的民眾：

今仔日來到遮，看著足濟表演的方式。閣有看著市集，嘛看著有人用尪仔搬戲，嘛有看著跳現代舞的演出，得到真濟心得。因為知影講，表演其實有足濟形式會當展現。明年若是閣有這个活動，我會閣揣朋友做陣來參加。

只要一百摳，著會當來草草戲劇節耍一工，有真濟趣味閣心適的表演會當欣賞。閣有市集通踅、講座通聽。為著欲鼓勵鄉親作伙來關心藝文活動，幼稚園以下的囡仔，甚至是會當免費來參加。